D16 balafirên şer yên artêşa Tirkiyê êrîş birin ser herêma Kurdistana azad û quntara Qendîlê ya girêdayî qezaya Pişder bombebaran kirin.
ZINARÊ XAMO EBalafirên Tirkiyê di vê êrîşê da wasiteyeke malbateke kurd jî bombebaran kirin û malbata (8-10 kes) di erebê da hemû kuştin.
Di nava kuştiyan da 3 zarok jî hene, ji zarokan yek 3 salî û yek jî 6 mehî ye û yê din jî 11 salî ye.
Termê du kesên din jî hîn nehatine dîtin.
Li gel ku çapemeniya kurd termên zarokan yên perçe pereçe bûyî weşandind jî hikûmeta AKP-ê derbarê vê êrîşa hovane da xwe kerr dike û heta tu beyan nadeye.
Erdogan fena ku tiştek nebûbe dengê xwe nake.
Medyaya tirk ji xwe qed qala bûyerê û vê wahşeta ku li hemberî zarokekî 6 mehî hatiye kirin nake û xebera wê jî nade.
Erdogan, ji dewleta Îsraîl ji ber ku 9 hemwelatiyên wî kuştin uzur û tazmînatê dixwaze.
Lê dema balafirên Erdogan bi emrê wî gundên kurdan bombebaran dikin, bedenên zarokên kurdan yên 6 mehî û 3 salî bi bombeyan perçe perçe dikin, bira uzur û tazmîna li wir bimîne, camêr tew dengê xwe jî nake.
Bêguman ewê dengê xwe nekin, ji ber ku yên hatine kuştin kurd in , zarokên kurdan e.
Û bi bombebarankirinê ji xwe armanca wan jî ev e.
Ji bo ku balafirên tirk 12 gundên kurdan wêran kirin, 10 kurd kuştin, laşê zarokê 6 mehî perçe perçe kirine çapemeniya tirk pir dilşaye,
Lêdana her hedefekê, avêtina her bombeyekê medyaya tirk bi kêfxweşî û şahiya avêtina golekê pîroz dike, dibêjin "goooool, gooooool.." û pê kêfxweş dibin...
Bêdengiya hukûmeta AKP-ê heta dereceyekê meriv fêm dike, lê çapemeniya welatekî li hemberî miletekî mezlûm çawa dikane hewqasî bêûjdan û bêmerhemet be, aqilê meriv nagre...
Şêla medyaya tirk ya nemirovane ya li hemberî kurdan meriv matmayî dihêle.
Dema mesele dibe kurd, medyaya tirk weke dezgeheke leşkerî û di emrê artêşê da dixebite. Ji bo ku artêş êrîşê bibe ser kurdan, gundên wan wêran bike, xwîna wan birjîne, bi şev û rojan bombeyan bi ser serê kurdan da bibarînin medya tirk her babet tahrîkê dike. Ji artêşê bêtir ew şer dixwaze...
Di serî da hukûmeta herêma Kurdistanê û hemû kurd, dibê li hemberî vê hovîtiya dewleta tirk bêdeng nemînin û ji dewleta tirk uzur û tazmînatê bixwazin.
Dibê xwîna zarokên kurdan li erdê nemîne, dibê hukûmeta AKP-ê hesabê van cînayetên xwe bide. Ji ber ku ev şer, şerê Erdogan û AKP-ê ye, Erdogan vî şerî dixwaze....
Tirk nahêlin li Sûriyê jî kurd ji bindestiyê xelas bibin
Ji bo ku kurd mafekî netewî bidest nexin, Tirkiyê li Îraqê çi dikir, li Sûriyê jî eynî tiştî dike.
Dewleta tirk, ji alîkî da zixtê dide ser ereban ji bo ku kurdan li derî hevkariyê bihêlin, tu mafekî wan qebûl qebûl nekin.
Û ji aliyê din da fîtneyê dixin nava kurdan, kurdan bera hev didin, ji bo ku di nava xwe da tifaqekê çênekin.
Nuha dewleta tirk bi hemû dezgehên xwe ve tenê li dijî kurdan dixebite.
Rojeva hemû organên dewletê ya yekem, kurd li Sûriyê, li Tikriyê û li Îranê jî weke li Îraqê nebin xwedî statuyeke siyasî.
Welhasil heta ku li Tirkiyê kurd ya bi rehetî ya jî bi zorê, zora vê dewleta ceberût nebin, yanî mesela kurd li Tirkiyê çareser nebe, tirk nahêlin li beşekî din yê Kurdistanê kurd bigihîjin azadiay xwe.
Çimkî tirkan hebûna xwe bi tunekirina kurdan ve girêdane.
Li gorî siyasetmedarên tirk hebûna kurdan û çêbûna Kurdistanê wendabûna tirkan û dewleta tirk e.
Mixabin ev yek yanî tirsa çêbûna Kurdistanê bûye paranoyeke tirkan ya pir mezin...
Emê çawa wan ji vê paranoyayê xelas bikin ez nizanim.
Belkî jî heta ku Kurdistan çênebe tirkê ji vê paranoyayê xelas nebin...
Vebûna plana AKP-ê ya tasfiyekirinê bû
Min nuha di Roj TV da li programa ku Şerafetîn Elçî û Ayhan Bîlgen jî weke axatevan beşdar bûn temaşe kir.
Programeke pir baş û bi mistewa bû.
Ayhan Bîlgen di axaftina xwe da tespîtek kir, got, "Vebûn planeke tasfiyekirinê bû" lê bi ser neket.
Bi dîtina min tespîteke rast e, ji xwe heta bigihîje serokerkanê wê demê jî got, teror bi çek û şer tenê naqede, dibê meriv di gelek cepeheyan da biçe ser.
Erdogan û Gul jî digotin "pakêta kurd", "vebûn" , başkirinên aborî hemû jî beşên têkoşîna me ya li dijî terorê ye.
Bi siyaseta "vebûnê" hukûmetê wisa hesab dikir ku ewê PKK ji hêz da bike û belkî jî belav bibe...
Lê hesabê hukûmetê yê mal û bajêr li hev derneket, PKK bi "vebûnê" ne ji hêz da ket û ne jî belav bû.
Loma jî ma hukûmetê nuha dîsa wasiteya şer xist dewrê, dixwaze dîsa vegere nuxteya berê...
Ji ber ku hukûmet hîn nehatiye nuxteya qebûlkirina hebûna kurdan û dayina mafê wan yên netewî.
Roja ku Erdogan dev ji luxata xwe ya "yek milet" î berda wê demê mesela kurd hel dibe..
Heta ku serokwezîrê Tirkiyê Erdogan neyê vê nuxteyê, yanî hebûna kurdan weke milet qebûl neke û vê yekê negre bin garantiya qanûna esasî hemû "vebûn" û "pakêt makêt" xapandin û taktîkên qezenckirina wextê ye.
Erdogan li dû helandina gelê kurd e
Çapemeniya tirk dinivîsîne, Erdogan ewê cejna BDP-ê pîroz neke
Serokwezîrê Tirkiyê Erdogan, çend roj berê di beyanake xwe da bêyî ku nav bide ji BDP-ê ra gotibû, ”Li vî welatî kesên ku mesafeyekê nexin nabêna xwe û rêxistina terorê ew jî îştîrakî vî sûc dikin. Û ewê jî bedelê vî sûcî bidin.”
Li gorî rojnameya Millîyetê dinivîsîne, ji ber ku BDP-ê ”mesafe nexistiye nabêna xwe û rêxistina terorê” Erdogan ewê BDP-ê negre programa xwe ya pîrozbahiyên Cejnê Remezanê.
Rojname dinivîsîne, dibêje piştî vê şêla Erdogan, AKP-ê jî biryar daye ku ew jî cejna BDP-ê pîroz nekin.
Xwedêgiravî sebebê vê şêla Erdogan û AKP-ê ya dijminane, ”BDP mesafeyekê naxe nabêna xwe û rêxistina terorê” û kirinên wan mahkûm nake.
AKP, di reaksiyona xwe ya li hemberî BDP-ê da ewê bi pîroznekiran cenjnê tenê jî nemîne.
Ji nuha û pîva êdî ewê bi BDP-ê ra tu hevdîtinan jî pêk neyne.
Serokwezîr Erdogan, di demeke nêz da ji bo hevdîtinên derbarê qanûna esasî ya nuh da ewê ji hemû partiyan ra nameyekê bişîne.
Lê ji bo ku ” mesafe nexistiye nabêna xwe û rêxistina terorê û di meclîsê da sond nexwariye”, Erdogan ewê ji serokê grûba BDP-ê Selahattîn Demirtaş ra nameyê neşîne û wî dawetî hevdîtinan neke.
Rojname di xebera xwe da dibêje, eynî reaksiyonê serokê meclîsê Cemîl Çîçek jî ewê nîşan bide.
Çîçek, ewê him Demirtaş ziyaret neke û him jî ji bo xebatên qanûna esasî ya nuh BDP-ê dawetî komisyonê neke.
Carê ”sebebên” xeyda Erdogan ya ji BDP-ê kuliyen(hemû) derew û hinceteke(mahneyeke)destpêkirina şer e.
Erdogan heta nuha yek carê jî silav nedaye parlamenter û berpirsiyarekî BDP-ê û neçûye ziyareta wan.
Ne tenê silav nedaye, heta pir ne mecbûr be tu carî navê BDP-ê jî nagre devê xwe.
Ji roja BDP ava bûye heta nuha, Erdogan belkî 3-4 caran jî navê BDP-ê negirtiye devê xwe û ji xwe tu carî navê serokekî BDP-ê bilêv nake.
Ev jî nîşan dide ku Erdogan merivekî çuqasî neyarê miletê kurd e.
Sebebê vê neyartiya Erdogan ya bi BDP-ê ra ne munhasirî BDP-ê ya jî PkK-ê ye, ew li hemberî hemû hêz û rêxistinên kurd xwediyê vê uslûba bêtehamul û dijminaneye.
Lê ji ber ku BDP û PKK îro ji hemû hêz û partiyên din xurttir in loma ew kîn û nefreta xwe li hemberî BDP û PKK-ê bêtir nîşan dide.
Yanî sebebê kîna Erdogan ne rêxistin e, hêz e, ji ber ku BDP û PKK îro xurt in loma Erdogan ji wan wisa dibehece.
Yanî dijminatiya Erdogan ya li hemberî BDP-ê ne girêdayî van bûyerên dawî û şêla BDP-ê ya li hemberî van bûyeran e.
Dijminatiya Erdogan ya li hemberî BDP-ê ji reaksiyoneke siyasî bîtir, sekneke îdeolojîk ya li hemberî doza miletê kurd e.
Erdogan siyasetmedarekî pragmatîst, nîjadperest û xwediyê îdeolojiyeke tirk-îslamîst e.
Herçiqas carnan, di hin demên ku ew mihtacî alîkariyê bûye rola siyasetmedarekî demokrat lîstibe û xwe weke merivekî lîberal û terefdarê çareseriya mesela kurd nîşan dabe jî ne rast e, di esasê xwe da ew merivekî dîktator û ceberût e û ji kok da li dijî hebûna miletê kurd e.
Û ji xwe ji roja roj da jî Erdogan ev rastiya dilê xwe tim daye der û tim gotiye, ”yek milet”.
Maneya ”yek milet” î, yanî ez hebûna kurdan qebûl nakim, dibê hemû kurd bibin tirk.
Ew kurdên ku heta nuha ev îdeolojiya Erdogan nedîtibin û fêm nekiribin ya pir nezan û reben in, ya jî ji dil hevalbendên Erdogan in, ew jî naxwazin kurd azad bibin.
Lê ev yek nayê wê maneyê ku yên din ji Erdogan baştir in. Helbet ne wiha ye, Erdogan ji Bahçelî çêtir e.
Ev tiştekî din e. Tiştê ez dibêjim, dibê meriv dijminê xwe baş nas bike û di heqê wî, siyaset û îdeolojiya wî da nebe xwedî xeyalên ne realîst û ne rast.
Erdogan û AKP dibêjin tiştê me îro daye kurdan ji serê we zêde ye û ji vê zêdetir jî hûn zirnîqekê jî nabînin.
Hemû ”nermbûn”, ”vebûn” û ”pakêtên” hatin vekirin ji bo belavkirina PKK-ê, serîlêgerandinê û qezenckirina wextê ye.
Tu nêt û perojeyek AKP-ê ji van ”tiştên” ku îro dane kurdan zêdetir bide kurdan tuneye, dibê em vê rastiyê bibînin.
Heger ne wiha bûya hukûmetê dikanîbû bêyî ku bi partiyekê, bi hêzekê ra rûne dest pê bikira û mafê kurdan bidayê.
Ma dema dewlet hebûna kurdan di qanûna esasî da qebûl bike, perwedeya bi zimanê kurdî têxe jiyanê, kî dikane rê li ber vê yekê bigre ku?
Ji bo dayina van mafan dewlet ne hewceye bi BDP û PKK-ê ra bazariyê jî bike…
Lê nakin, ji ber ku ne dewlet û ne jî hukûmeta AKP-ê û bi taybetî jî Erdogan îro pir û pir dûrî çareserkirina mesela kurd in, ew hîn jî wisa bawer dikin ku bi çekan, bi şîdetê ewê PKK-ê biqedînin û bi vî hawî tevgera kurd ya netewî bişlînin….
Hedefa AKP-ê îro ev e..
Tirk di propagandeyê da pir serkeftî ne
Beşir Atalayê berpirsiyarê çareserkirina pirsa kurdî û alîkarê serokwezîrê Tirkiyeyê Recep Tayyip Erdogan, do êvarî di kanaleke telewîzyonê da got, ”li dijî PKK-ê di navbera hemû organên dewleta Tirkiyeyê da hemahengî û hevkariyeka temam heye û koordînasyona Tirkiyeyê ya bi Emerîkayê ra jî pir saxlem dixebite.”
Bi gotineke din, di nabêna hukûmetê û leşkeran da dubendî û duserîtî nemaye û bi Emerîkiyan ra jî di nava hevakriyeke li gorî dilê xwe da ne.
Yanî di siyaseta li hemberî kurdan tê meşandin da hukûmet êdî bi destê xwe ye û tu gazineke wan ji organeke dewletê ya din tuneye.
Ev, aliyê meselê yê hundur û yê Emerîkayê.
Li ser aliyê meselê yê Ewrûpayê jî di eynî programê da Atalay got:
“Li welatên Yekîtiya Ewropayê jî li herberî serkaniyên fînansê yên rêxistina terorê operasyonên pir cidî hatin kirin. Parvekirina malûmatên îstixbaratî yên digel Emerîkayê berdewam dike û di vî warî da hîç problemeka me nîne.”
Wektê dîtin, li hemberî PKK-ê, Emerîka tam alîkariya wan dike.
Hemû welatên Yekîtiya Ewrûpayê alîkariya wan dikin.
Û bi rastî jî wisa ye.
Almanya, Fransa, Îngiltere, Danîmarka, Îspanya, Holanda, Yûnanîstan, Romanya yanî bi kurtî hemû walatên Yekîtiya Ewrûpayê mohra rêxistina ”terorê” li PKK-ê dane û her daxwazên Tirkiyê tavilê bicîh tînin.
Îsraîl ji wan bêtir li dijî PKK-ê ye û di her warê teknîkê û îstîxbaratê da alîkariyê dide wan.
Rûsya, Îran, Sûriye, hukûmeta Îraqê ya merkezî û hemû welatên Ereban jî li dijî PKK-ê ne û ew jî piştgiriya Tirkiyê dikin.
Yekîtiya Îslamî li pişta wan e.
Yanî Emerîka, Îsraîl, 27 dewletên Yekîtiya Ewrûpayê, Yekîtiya Îslamî, Yekîtiya Ereban, Yekîtiya Dewletên Tirkî hemû li djî PKK-ê ne û piştgiriya dewleta Tirk dikin.
Lê siyasetmedarên Tirk hewqasî bêûjdan û bêexlaq in ku dîsa jî dibêjin “tiliya derve” di mesela kurd da heye, hin dewletên ji Tirkiyê hez nakin PKK derxsistine û wê li hemberî Tirkiyê pîj dikin.
Beşîr Atalay jî di programê da eynî tişt got. Li gor wî jî tevgera kurd ya netewî û hebûna PKK-ê û şerê kurdan yê ji bo azadî û mafên xwe yên rewa bi hin “tiliyên derve”, bi hin dewletên ku “naxwazin Tirkiye xurt bibe” ve girê da (û ji xwe tim wiha dibêjin)û got ji bo lawazkirina Tirkiyê destê van dewletan di mesela kurd da heye.
Law hey bêûjdan û bêexlaq, hemû cîranên Tirkiyê, 27 dewletên Yekîtiya Ewrûpayê, Emerîka, Îsraîl, Yekîtiya Ereban,Yekîtiya Îslamî, Yekîtiya Dewletên Tirkî hemû li dijî PKK-ê ne û bi we ra ne û hûn hîn jî dibêjin “tiliya derve, tiliya hin dewletên ku xurtbûna Tikiyê naxwazin” di mesela kurd da heye.
Ma li cîhanê dewlet ma?
Hemû dewletên ku kanibin alîkariya kurdan bikin heval û dostên we ne û li dijî kurdan e.
De îcar çawa hûn hîn jî dikanin bibêjin ku ”tiliya derve” di têkoşîna PKK-ê da heye?
Ez medyaya tirk didim aliyekî, ji ber ku mediya tirk bi hemû şaxên xwe nîjadperest e û weke dezgeheke dewletê dixebete
Lê tiştê herî ecêb, miletê tirk jî ji vê derewa leşker û siyasetmedaran ya bi boçik bawer dike.
Emerîka, Îsraîl û Yekîtiya Ewrûpayê bi kêmanî bi qasî Tirkiyê li dijî PKK-ê ne, lê dîdsa jî ew van dewletan wekî ”xwêrnezwazên Tirkiyê” û hêzên li pişt PKK-ê dibînin û wisa nîşan didin.
Îran, bi tank, top û balafiran her roj li PKK-ê û kurdan dixe, rojê xortekî endamê PKK-ê bi darde dike, ji bo qedandina kurdan û PKK-ê hovîtiya nemayî dike, lê tirk dîsa jî dibêjin Îran li pişt PKK-ê ye...
Rastiyek çawa dikane hewqasî belovacî were kirin bi rastî jî aqilê meriv disekine.
Di vê yekê da bêguman xizmeta herî mezin medyayê kiriye, medyayê ev bêbextiya ku li kurdan dibe weke rastiyekê xistiye serê miletê tirk jî.
Loma jî dibê meriv qebûl bike ku tirk di propagandeyê da pir serkeftî ne, di rojnameyeke weke Tarafê da jî(hin nivîskar netê da) dikanin weşaneke tam li gorî dilê dewletê bidin kirin.
Em mezlûm û bi heq in, lê em nikanin vê mezlûmî û biheqbûna xwe bi miletê tirk û bi cîhanê bidin qebûlkirin...
Bi kuştina zarokên 6 mehî hûn însaniyeta xwe jî dikujin!
Beş/Mijar:
0 şîrove:
Post a Comment
TU ÇI DIBÊJÎ?
Şîroveya xwe binivsîne û bi riya HAWAR NET'ê dengê xwe bigihîne herkesî!
Ji bo şîrove nivîsandinê pêşî yan "name/URL" an jî "anonoymous" ê hilbijêre...
Divê şîrove ve bi Kurdî bêne nivîsandin...